Naam: Prins Tim Ie (Neijnens)
Gebore: 23-08-1992
Naodet os mam zoeë häör bist haaj gedaon om mich in Kelpe-Oler gebore te laote waere, ging ’t fieëst wiejer in ’t zekehoes, woeëdoor noe ‘Wieërt’ in mien paspoort steit. Dr. Alban mit It’s My Life stong op nr. 1 inne top 40 en klonk, net wie al die anger hits van dae tied, door ’t hoes. As aodste zoon van Peter en Gerrie Neijnens-Nouws haaj ich ‘ne fantastische jeugd op ‘t Wessemerven. As nineties kid speeldje wae op straot mit völ te groëte, kleurrieke kleier aan en zoot ich ore in mien eige fantasie te bouwe mit mien enorme lego verzameling. Nao alle klasgenootjes te höbbe opgehoold die oppe weeg nao sjoeël woeëndje, wore wae meistal net oppe tied veur de bel. Mien breurke Sil waas miene kammeraod en os Jelle kwoom pas later wie ich al 9 waas. In groep 8 waas ich jeugdprins woeëvan ich de spanning nog steeds kan veule. Miene oeëm Ben waerdje det jaor groeëte prins. ’n Groeëter verassing en ’n sjoeëner jaor haaj ich mich neet kinne verzinne.
Nao basissjoeël Sint Liduina ging in 2005 mien reis per fiets wiejer nao Heitse. Dao kwoom ich in contact mit alleranje jonges en maedjes oet anger dörpe, woeëbie ich michzelf steeds baeter lieërdje kinne. Mit deze vrinjegroep maakdje wae de gekste dinger mit en koste allemaol oszelf zeen. Mien ieërste cente waerdje verdeendj bie Bolle woeë ich drie aovendje inne waek stong aaf te wasse. Nao ’t werk dronk ich d’r mien ieërste pilskes die ich nao ’n paar kieër echt lekker begos te vinje. Vanaaf miene kinjertied zoot ich bie de Ko Kids en later as leiding. Ich verheugdje mich altied weer op ’t klein- of groeëtkamp. Ongertusse ging de zomervakantie mit os pap en mam al jaore nao Frankriek. Ich ontwikkeldje ’n leefdje veur det landj en de taal. Dees leefdje zal ich altied bie mich blieve drage. Hiedoor koos ich op Sint Ursula veur Frans in plaats van Duits en deej dit oppe hotelsjoeël weer.
De kneepkes van ’t horecavak lieërdje ich vanaaf 2009 oppe Rooi Pannen in Eindhove. Natuurlik mos ich richting Franstalig gebied veur mien lètste stage en zoeë kwoom ich in Brussel terecht. ’n Fantastische, wereldjse stad woeë ich mich de taal eige mook. ’t Haaj neet völ gesjildj of ich waas neet terukgekomme. Ondanks det ich miene vrindj Bas haaj lieëre kinne, sjreef ich mich in veur de hoeëge hotelsjoeël aldao. Op ’t moment det ich veur ’n kamer zou gaon kieke, kreeg ich de vraog of ich interesse haaj om de café euver te numme. Al snel krege Bas en ich dao zin in en verangerdje ’t plan. Bie de Tied mos ’t waere!
Bas ging nog nao sjoeël, mer ich stong vanaaf mien 21ste dök tot laat achter ’t buffet. ’n Klein, naat caféke bouwdje wae bietje bie bietje om tot ’n begrip. ’n Gesprekske mit ‘ne vaste gast huuërtj d’rbie, mer ’t fieëste tot deep inne nacht toch zeker ouch. Stillekes aan waerdje ’t drukker, serveerdje wae lunch en diner, herlaefdje Kelpe-Oler kèrmis en laefdje ’t vereinigingslaeve. Op ‘ne sjoeëne zunjig in 2017 ging ich mit de sjutterie mit nao ’t OLS en waerdje geliek lid. As bure vanne kirk waerdje die door mich oop en toegemaaktj, geliek mit de café. As de klokke moste waere geloedj, deej ich det gaer. Bie de Tied höbbe wae op os eige tempo kinne ontdekke en gruje tot wae neet mieër wiejer kwome. De gedache om oeëts te motte vertrikke en al die wermdje vanne café te motte achterlaote, veuldje as hieël zwaor. Toch waas ‘t tied veur ’n noe avontuur. Wae verhoezje nao de kèrkstraot en droge Bie de Tied euver.
Blood zweit en traone heet ’t gekostj, mer den höbs se ouch get. Op ’n prachtige locatie ane Maas in Lin opendje Bas en ich in 2023 Brasserie LUS. Nao jaore te höbbe gewirktj ane sloop, vergunning, financiering en oeteindelijk de bouw, waas ’t vaerdig. Alles mos klaorstaon, tot inne puntjes, want zoeëget kins se mer eine kieër tegooj doon. Inmiddels is LUS al ’n jaor oop en ’t systeem zitj d’r good in. De zaak löptj en dorom is d’r tied om de oetdaging vanne prinsejaegers aan te gaon.
Inmiddels bin ich 32, veur de jeugd klinktj det al aod, mer de meiste minse vinje det nog herstikke jonk. ’t Jaor 2025 wörtj ’t jaor van Prins Tim I.
Vastelaovendj ich LUS dich rauw!
Alaaf!
