BIOGRAFIE
Prins Patrick II (Wetemans)
Geboren; 11 december, 1973
Mien laeve lang woeën ich al oppe Kuuper in Oler.
Ieërst mèt Pap & Mam en mien twieë aojer zösters.
En noe mèt mien eige gezin, same mèt Angelina en os veer kinjer, Bente (18), Raf (16), Imme (13) en Sep (10).
Nao de basissjoeël in os dörp höb ich mien sjoeëlcarrière voortgezatte oppe MAVO in Heytse.
En vervolges höb ich de MAS in Remunj aafgeslote.
As klein jongk höb ich bie de fietscross club in Kelpe-Oler mich ’t leecht oet de uig gefietsj, en auch bie de scouting höb ich alle groepe doorloupe.
In 1995 bèn ich boorebroedegom gewaesj.
’T Waas ‘n drök bezochtje broeloft waat veul boetedörpse jongere nao Kelpe-Oler trok.
Vanoet kefee De Smeed ging ich mèt mien kammeräöj op stap in Nederwieërt, Wieërt of nog verder. Zoeë höb ich Angelina in 1996 lieëre kinne. En noe woeëne wae al vanaaf 1998 same oppe Kuuper. Mèt VKBGAB (Vriende Groep Bie Gebrek Aan Baeter) höbbe wae al vaak mèt geloupe inne vastelaovundjoptocht in os dörpke. En auch mèt anger activiteite in os dörp zultj gae de naam VKBGAB ongetwiefeldj dökker tege zeen gekome.
In 2001 höb ich ’t gemingdj bedrief van Pap & Mam euvergenome. Mèr al snel waas dudelik det ich mieër mèt vaere haaj den mèt krulstertjes. ’T bedrief heet zich verder ontwikkeldj tot det de grenze in ’t Kujeldreiersrieëk bereiktj woore. Dus toen zich in 2012 de kans veur deej in ’t Plekploastersrieëk, höbbe wae dao nog ‘n sjoeën 2e locatie ontwikkeldj. Mèt dees 2 locaties verdene wae ozze botterham.
De Formule 1 volg ich auch al jaore oppe voot. Meistens thoeës oppe bank veur de tillevies, mer aaf en toe mosse ’t geronk vanne F1-auto’s huure en veule en ’t rubber vanne benj kinne ruuke op ’t circuit, det is toch waal ’t sjoeënst.
Sinds 3 jaor zit ich bie de handjboogvereiniging “de Gezellige Oore” in Baoksum. Hie oefen ich edere dinsdig om inne roeës te sjeete, mèr ich dink det ich nog waal get langer mot oefene…
Zoeë, ich dink det ich noe waal zoeë’n bietje alles verteldj höb euver michzelf.
En det gae noe ‘n good bieëldj höbtj weem d’r mèt dees daag veur uch steit.
Ich wins uch allemaol ‘ne sjoeëne vastelaovundj en wae kome os vast en zeker tege!!
“Gaotj neet mèt de kippe op stek, mèt dees daag is os niks te gek!”
Vastelaoves groet,
Prins Patrick II